photo: thefocuscourse
الولد بيعيط مش عارف أعمل إيه، تعبت خلاص.
الواد ضرب صاحبه في المدرسة، مش عارف أعمل إيه، كفاية زهقت، تعبت.
دة جزء من الشكاوى اللي دائماً الأب أو الأم بيشتكوها لما يكون عندهم أولاد.
لكن بالرغم من الشكاوى دي، بالرغم من الدراما دي، في الأخر الأب أو الأم بيكون عندهم مسؤولية إتجاه أولادهم أنهم يربوهم صح و ياخدوا بالهم منهم.
نفس الكلام بينطبق على النجاح، لازم تبقى ناجح، ماعندكش خيار غير كدة.
النجاح زي إبنك، النجاح ممكن يعمل لك مشاكل، ممكن يتعبك، ممكن يخليك تسهر الليل، بس لازم تبقى ناجح ماعندكش خيار تاني.
النجاح هو واجب، فرض، و مسؤولية.
و دي أول فكرة من كتاب قانون العشرة أضعاف The 10X Rule
أنواع النجاح كتير، علشان تكون إنسان ناجح لازم تبقى ناجح في مجالات كتير، مش بس لازم تبقى ناجح في المجال المادي، لكنك لازم بردوا تبقى ناجح في المجال الروحي، أو علاقتك مع ربنا، أو المجال التطوعي، أو المجال العائلي، أو في شغلك.
طيب إزاي تبقى ناجح؟ إيه اللي بيفرق بين الناجح و الفاشل؟ إمتى نقول على واحد ناجح؟ هل فعلاً إذا أنت ماكنتش ناجح يبقى عمرك ما هتبقى ناجح؟
النجاح هو على عكس الذهب و الفضة اللي ممكن يخلصوا في أي وقت، النجاح مابيخلصش، يعني لو إنت دلوقتي قاعد و حاسس إنك فاشل و ماعندكش أي حاجة في حياتك تعملها، أو أن إنت فشلت في دراستك أو فشلت في شغلك، لازم تعرف أن النجاح مابيخلصش، مافيش حد للنجاح، مافيش حاجة إسمها النجاح بيخلص، النجاح مابيخلصش أبداً، النجاح موجود و بكثرة، المهم تعرف إزاي تبقى ناجح، و قبل ما نتكلم عن قواعد النجاح و الفرق بين الناجح و الفاشل، خلينا نتكلم عن 4 أنواع للأفعال:
1- لا يفعل (مابتعملش حاجة خالص) و دة بينطبق على الناس الكسلانين، الناس اللي عندهم ملل، الناس اللي بيقعدوا على اليوتيوب و الفيس بوك طول اليوم و مابيعملوش أي حاجة في حياتهم، مابيطوروش من نفسهم، مابيشتغلوش.
2- يتراجع (كل ما تبدأ في الشغل تتراجع و ماتكملش) و دي على سبيل المثال الناس اللي بتخاف تعمل حاجة لاحسن الناس تتكلم عليها أو تقول عليها حاجة زي كومنت وحش أو أن أصحابهم يتريقوا عليهم، أو أنك يكون عندك فكرة و ماتعملهاش، فيه أنواع كتير من التراجع و كلها بتنتج عن الخوف، زي اللي بيخاف يقدم الـ CV بتاعه في الشركات بحجة أن الشركات مابتوظفش.
3- عادي (تشتغل شغل بس في مستوى عادي جداً) و النوع دة هو نوع الأغلبية الساحقة من الطبقة متوسطة التفكير، اللي بيقول و الله خلى الحياة تمشي كدة و بلا وجع دماغ، دة اسوأ نوع من الأفعال، النوع اللي بيشتغل من 9 إلى 5 و مابيطورش من نفسه أبداً، تخيل شركة بتسوق المنتج بتاعها و بتقول المنتج بتاعنا عادي تعالوا إشتروه، الإجابة هتكون لأ شكراً.
4- 10X (تشتغل بمجهود 10 أضعاف اللي المفروض تعمله) دي الناس اللي بتشتغل على نفسها، الناس اللي بتتعب، اللي بتاخد كورسات، اللي بتحاول إنها تقرب من ربنا، اللي بتقرأ كتير، النوع دة من الناس هو اللي إنت المفروض توصل إليه.
إزاي توصل لمستوى الـ 10X إزاي توصل لمستوى النجاح دة؟
قانون الـ 10X أو قانون العشرة أضعاف، بيقولك أن فيه 5 حاجات لازم تمشي عليها علشان تبقى ناجح:
الخطوة الأولى: هي أن تكون مهووس، تبقى مجنون.
لو إنت مثلاً في البزنس و عايز تبيعلي منتج معين، إزاي أنا هشتري المنتج دة إذا كنت أنت أساساً مش مقتنع به، النجاح بياخد مجهود كبير جداً، و بياخد وقت، بتتعب فيه جداً، النجاح مش سهل، النجاح بيحتاج شغل على مستوى 10X أو عشرة أضعاف، علشان تبقى مميز لازم تشتغل و تبرز نفسك، إزاي هتعمل كدة إذا كنت أنت مش بتحب الشئ اللي أنت بتعمله؟
الخطوة الثانية: الأهداف.
إزاي توصل للنجاح و أنت أهدافك صغيرة؟ الناس دائماً بتقولك ياعم خليك واقعي، ماتحلمش كتير لاحسن تقع على رقبتك، دة فكر الناس العادية، الناس المتوسطة في التفكير، لو أنت عايز تبقى ناجح لازم تفكر بشكل أكبر بكتير من الأهداف اللي أنت عايز توصل لها، لو مثلاً حطيت لنفسك هدف أن أنت تخس 3 كيلو، عمرك ما هتوصل للهدف دة، هتلاقي نفسك بتخس ال 3 كيلو و بترجعهم تاني، أو عمرك ماهتخس كيلو واحد، لكن لو عندك هدف أنك تخس 30 كيلو، هتلاقي نفسك خسيت 5 كيلو أو 10 كيلو، ماتبقاش واقعي، ماتسمعش كلام الناس.
الخطوة الثالثة: الوقت.
دائماً الناس بتشتكي، أنا ماعنديش وقت، مافيش وقت أن أنا أشتغل، أنا متجوز، أنا عندي عيال، قانون الـ 10X العشرة أضعاف بيقولك: أنت هتخلص حاجات أكتر في نفس الوقت، مافيش حاجة إسمها مافيش وقت، لازم تلاقي الوقت، على سبيل المثال، الكاتب كان بيتكلم أن جاله بنت، الناس قالت له، إما مش هتلاقي وقت للبنت دي و إما مش هتعرف تركز في شغلك زي زمان، الكاتب قرر أنه يطبق قانون الـ 10X، قانون العشرة أضعاف، قرر أنه يعمل حاجات أكتر في نفس الوقت المتاح له، قرر أنه يصحى كل يوم ساعة واحدة بدري، يجلس مع بنته، يخرج معاها و يفسحها و بعد كدة يبدأ شغله زي الجدول اللي هوة ماشي عليه كل يوم، لو كلنا فكرنا بالطريقة دي عمر ما حد هيشتكي من الوقت، لو كلنا فكرنا أننا نعمل أكتر في نفس الوقت المتاح لدينا، و نزود الإنتاجية، عمرنا ما هنشتكي أن مافيش وقت.
الخطوة الرابعة: الخوف.
الناس بتخاف تعمل حاجات علشان ماحدش ينتقدها، يعني مثلاً أنت ممكن تكون خايف تعمل قناة على اليوتيوب علشان ماحدش ينتقدك أو علشان الناس ماتضحكش عليك، لازم تتخلص من الخوف، لو أنت شايف أن الحاجة اللي هتعملها خايف منها، طبق قانون الـ 10X ، قانون العشرة أضعاف، قانون الـ 10X بيقول لك أنت لو إشتغلت أكتر حتى لو أنت فشلت و الناس بتضحك عليك، أحسنلك من أنك ماتجربش أو ماتعملش حاجة أو تتراجع.
الخطوة الخامسة و الأخيرة: ماتكونش زي الطفل الرضيع.
الطفل الرضيع لسة مش عارف أي حاجة في الدنيا، كل حاجة خارجة عن سيطرته، مايقدرش يعمل أي حاجة خالص، لو أنت هتلعب دور الضحية في حياتك، عمرك ما هتبقى ناجح، لو قعدت تقول، والله إقتصاد البلد وحش جداً، و الله أصل مافيش شغل، ماعنديش وقت، ماعيش فلوس أبدأ بزنس، كل الكلام دة لازم تتخلص منه، و إلا مصيرك هيكون الفشل، فلا تستسلم للمبررات.
يا ترى بقى عايز تبقى فاشل ولا عايز تبقى ناجح؟
نص قانون 10 أضعاف على أنه (1) يجب أن تضع أهدافًا لنفسك أكبر بمقدار 10 مرات مما تعتقد أنه يمكنك تحقيقه و 2) يجب عليك اتخاذ إجراءات أكبر بمقدار 10 مرات مما تعتقد أنه ضروري لتحقيق أهدافك. بس كدة.
